Petersen: Tani për tani nuk mund të thuhet se sulmuesit e çiftit Vuçiq ishin shqiptarë

Kryeadministratori i Kosovës, Soren Jessen-Petersen gjatë një vizite që sot ai bëri Bujanocit të Luginës së Preshevës, pas takimit të tij me serbë e romë, tha se kthimi i të zhvendosurve në Kosovë është prioriteti në planin e zbatimit të standardeve dhe përkatësi e punës së tij. Gjatë së njëjtës vizitë ai ka thënë se hetimet rreth rastit Vuçiq po vazhdojnë dhe se tash për tash nuk mund të thuhet se sulmuesit ishin shqiptarë, ashtu siç janë referuar disa zyrtarë serbë në Beograd. Petersen është shprehur se, “Një pjesë e të zhvendosurve me të cilët bisedova ishin të zemëruar dhe i kuptoj ata. Edhe unë jam i zemëruar gjithashtu sepse është turp që gjashtë vjet më pas ata ende jetojnë në kushte të rënda”, tha Jessen-Petersen, duke iu referuar kushteve të jetesës në njërën nga qendrat kolektive ku janë të vendosur mbi 100 serbë të komunave të Vitisë dhe Gjilanit. Pjesëtarët e pakicave serbe dhe rome të Kosovës që aktualisht gjenden në dy qendra kolektive të këtij qyteti, në takim e sotëm me Jessen-Petersenin kanë shfaqur pakënaqësi të shumta për gjendjen e tyre momentale dhe për pamundësinë e kthimit në pronat e tyre të mëparshme. Në lidhje me rastin e rrahjes brutale të çiftit Vuçiq, Petersen u ka bërë thirrje zyrtarëve serbë e posaçërisht atyre në Beograd që të jenë të kujdesshëm me vlerësimin e tyre për gjendjen e sigurisë në Kosovë, duke theksuar në formë të veçantë rastin në Cërkolez të Istogut, ku një çift i vjetër serb u sulmua dhe u rrah brutalisht, në rrethana ende të panjohura për policinë. Qëllimi i vizitës së tij kishte për qëllim njohjen për së afërmi të kërkesave të personave të cilët janë zhvendosur nga Kosova së bashku me forcat serbe të sigurimit në qershor të vitit 1999.

Komentet e përdoruesve