Komiteti i Helsinkit: Zhvillimet në Kosovë po shkojnë drejtë konsolidimit

Në raportin më të ri të Federatës Ndërkombëtare të Helsinkit për të Drejtat e Njeriut, në pjesën për Kosovën, pos tjerash shkruan, se zhvillimet në Kosovë vazhdojnë drejt konsolidimit. Në këtë raport theksohet se institucionet demokratike janë konsoliduar më tutje dhe kapacitetet e tyre janë forcuar dhe zgjeruar. Kjo, sipas raportit, u bë e mundur pas transferit të një pjese të madhe të kompetencave që më parë ishin nën administratën e OKB-së tek institucionet vendëse të Kosovës me përjashtim të të ashtuquajturit autoritet të rezervuar. Megjithatë në këtë raport shkruan se progresi substancial ishte dëmtuar rëndë nga zhvillimet negative siç ishin ato në mars të vitit 2004 kur edhe shpërtheu dhuna ndëretnike dyditëshe në Kosovë. Korniza Kushtetuese e Kosovës parasheh liri të plotë të lëvizjes. Mirëpo në praktikë kjo e drejtë për serbët e Kosovës është ende me kufizime. Kjo ndodh se ende mbizotërojnë tensione ndëretnike dhe mungesa e lidhur me sigurinë ekzistuese ose të perceptuar. Çështja e personave të zhdukur në Kosovë mbetet problem serioz, thuhet më tutje në raport. Në fund të vitit 2004 numri i këtyre personave ishte 3182, prej tyre 76 për qind shqiptarë, 17 për qind serbë dhe 7 për qind pjesëtarë të grupeve të tjera etnike. Ndërkaq për sistemin gjyqësor në Kosovë në raport shkruan se Korniza Kushtetuese parasheh një sistem të pavarur gjyqësor që mbetet nën autoritetin suprem të drejtpërdrejtë të UNMIK-ut si pjesë e të ashtuquajturit autoritet të rezervuar. Megjithatë në praktikë sistemi gjyqësor nuk arriti të dëshmojë se është i liruar nga ndikimi i jashtëm dhe presioni.