Shkelet sërish afati për filtrat nga Kurum

Instalimi i filtrit pluhurkapës në uzinën e çelikut Kurum nuk është kryer as në afatin e parë, të caktuar më 30 qershor 2005, dhe as në afatin e dytë të paracaktuar më 14 gusht. Përveç kësaj, mbarimi i lejes njëmujore të punëtorëve rikthen përsëri ndotjen e atmosferës në parametrat alarmante dhe rrezikimin për jetën e banorëve. Investimi në vlerën e rreth 3,5 milionë eurove për instalimin në afat të filtrave kundër ndotjes arsyetohet me pengesa të shumta që kanë çuar në shtyrjen e këtij afati pas mesit të muajit shtator 2005. Ndotja nga Kurum Ndërsa, sipas drejtoreshës rajonale të mjedisit, Shpresa Banja, rifillimi i aktivitetit prodhues të Kurum-it do të prekë me ndotje nga pluhurat industrialë kryesisht zonën e Bradasheshit, dhe nuk do të ndikojë ndjeshëm në qytetin e Elbasanit. Vetë Banja e ka justifikuar vonesën e Kurum-it për investimin e instalimit të impiantit kundër ndotjes së mjedisit, se është penguar për shkak të konstruksionit tejet të amortizuar të objektit, veçanërisht mosardhja në kohë nga Turqia e aspiratorit që do të montohet në këtë impiant. Sipas pohimit të specialistëve, aspiratori, prodhim i përbashkët turko-gjerman, ende ndodhet në Turqi dhe pritet të vijë në Elbasan e të montohet. Vonesat e paparashikuar deri tani për këtë investim, sipas Banjës, do të kompensohen me shtimin e ritmeve të punimeve, duke bërë që më 16 shtator 2005 impianti të jetë vënë në punë, dhe ndotja në këtë rajon të kthehet në parametrat normale. Në muajin gusht drejtuesit e firmës turke Kurum, pronare me koncesion 30-vjeçar e ish-Uzinës së Çelikut në Elbasan, konfirmuan nisjen e investimit prej rreth 3,5 milionë eurosh (instalimi i impiantit pluhurthithës), duke u dhënë kështu 240 punëtorëve të prodhimit lejen e zakonshme. Por tashmë, “për shkak të vështirësive të paparashikuara,” sipas drejtuesve të Kurum-it, impianti nuk përfundoi më 16 gusht. Ndërsa punëtorët u rikthyen në punë dhe për Kurum-in nisi prodhimi. Kjo pritet të shoqërohet me ndotje të rëndë të mjedisit. Sipas statistikave të specialistëve, për shkak të ndotësve industrialë në periferi të qytetit të tri ndërmarrjeve (Kurum, Darfo, ECF) ndotja në pellgun e Elbasanit është 3 deri 7 herë mbi normat e lejuara të Këshillit të Europës. Drejtuesit turq të kompanisë dhe specialistë mjedisorë të rajonit premtojnë përsëri për vendosjen e filtrave, duke e vënë si datë 16 shtatorin, kur pritet të përfundojë instalimi i impiantit pluhurkapës, duke shpresuar uljen e ndotjes në Elbasan.

Komentet e përdoruesve