Kryeshefi që cenon lirinë e shprehjes, shkel ligjin, duhet të shkojë

“Në rast se mungon vullneti i kryeshefit Sahit Krasniqi për dorëheqje, kërkojmë që kryetari i KK-së të thërrasë një mbledhje të jashtëzakonshme për të kërkuar votëbesimin ndaj tij”, thuhet në kërkesën e OJQ-ve. Nismës së OJQ-së ferizajase INPO për shkarkimin e kryeshefit Sahit Kransiqi iu kanë bashkuar edhe 5 OJQ të tjera. Kërkesa për shkarkimin e numrit një të Qeverisë lokale është bërë publike të hënën në selinë e OJQ-së INPO, nga kryesuesi i saj, Ramadan Ilazi. Në deklaratën e lexuar janë potencuar disa nga arsyet që kanë motivuar OJQ-të ferizajase për të kërkuar dorëheqjen e Krasniqit. Cenimi i lirisë së shprehjes, fyerjet dhe sulmet e Krasniqit ndaj gazetarëve të ZR-së dhe KD-së, shkelja e ligjit nga ana e tij për qasje në dokumente zyrtare, duke i mohuar OJQ-së INPO një kërkesë të tillë, pastaj udhëheqja e tij burokratike, duke mohuar përfshirjen e qytetarëve në procesin e vendimmarrjes, mohimi i përgjegjësisë për llogaridhënie ndaj qytetarëve, krijimi i frymës së moskomunikimit në mes të institucioneve, identifikimi i tij me një qytetar që është mbi ligjin etj., janë disa nga mëkatet e kryeshefit të cilat potencohen në deklaratën e nënshkruar edhe nga OJQ-të FIQ, QD-ja, FSHDC-ja, 1 plus 2, etj. Këtë deklaratë, OJQ-të e kanë adresuar në shumë adresa për të cilat besohet se do ta kenë parasysh atë. Me këtë deklaratë, të parën e këtij lloji të formuluar nga OJQ-të ferizajase, duhet të merren kryetari i KK-së, përfaqësuesi i UNMIK-ut, OSBE-së, ministri i MPL-së, Ombudspersoni dhe liderët e partive politike të përfaqësuara në KK të Ferizajt. Në fund të deklaratës, nënshkruesit e saj kanë kërkuar që “në rast se mungon vullneti i kryeshefit Krasniqi për dorëheqje, kërkojmë që kryetari i KK-së të thërrasë një mbledhje të jashtëzakonshme për të kërkuar votëbesimin ndaj tij”. Do theksuar se kryeshefi dhe puna e tij shpesh janë gjetur në thumb të kritikës së opozitës dhe të opinionit ferizajas. Shih për këtë, para disa ditësh është formuar edhe një komision hetues i KK-së për të hulumtuar keqpërdorimet eventuale dhe korrupsionin në Qeverinë lokale të cilën e udhëheq ai. Gjithashtu, kryeshefin gjatë muajit tetor do ta përcjellin edhe disa gjykime në Gjykatën Komunale, pasi ai është paditur për vepra penale nga dega e PDK-së, SHPK-ja dhe nga ish-punëtorët e administratës komunale.

Komentet e përdoruesve