Banka Botërore: 15 për qind e kosovarëve në varfëri të skajshme

Një raport i Bankës Botërore që u publikua dje në Prishtinë thotë se varfëria në Kosovë ka shtrirje të gjerë, por mund të merren veprime direkte. Sipas vlerësimit të Bankës Botërore 37 për qind e popullatës radhiten si të varfër, ndërkaq 15 për qind e tyre ndodhen nën nivelin e varfërisë së skajshme. Këto rezultate të Bankës Botërore bazohen në anketën buxhetore të ekonomive familjare nga Zyra Statistikore e Kosovës. Sipas Bankës Botërore, 37 për qind e popullsisë si të varfër jetojnë me më pak se 1.42 euro në ditë. Ndërkaq 15 për qind e tyre me varfëri të skajshme jetojnë me 0.93 euro në ditë. Zëvendëskryeministri Adem Salihaj në diskutimin e tij tha se se ky raport po publikohet në kohën kur janë intensifikuar përgatitjet e qeverisë për hartimin e strategjisë dhe planit të zhvillimit. Ai shprehu bindjen se raporti do të shërbejë si një dokument, mbi të cilin mund të mbështetet ndërtimi i objektivave strategjike, politikat, programet dhe projektet që kanë të bëjnë me uljen e shkallës së varfërisë. Sipas Salihajt, kjo do të arrihet në dy mënyra: në kuadër të rritjes së mundësive për gjenerimin e të ardhurave dhe vendeve të punës, si dhe përmes rritjes së barazisë në qasjen e mundësive për shkollim dhe shërbime shëndetësore në të gjitha nivelet. Ndërkaq përfaqësuesi i Bankës Botërore në Kosovë Kantan Shankar kërkoi një përkushtim të fuqishëm nga hartuesit e politikave qeveritare dhe nga partnerët e tyre ndërkombëtarë, për të zbatuar programet politike që përshpejtojnë një rritje të gjerë dhe kontribuojnë në uljen e varfërisë.

Komentet e përdoruesve