Qeveria dhe PNUD per bashkepunime te metejshme

Kryeministri Sali Berisha, dhe drejtori rajonal i PNUD-it, Kalman Mizsei, nënshkruan javën e kaluar në Tiranë, një memorandum mirëkuptimi me qëllim, thellimin e bashkëpunimit për arritjen e Objektivave të Zhvillimit të Mijëvjecarit dhe zbatimin e Konventave e Samiteve të Kombeve të Bashkuara. Fushat që prek memorandumi kanë të bëjnë, përvec luftës kundër informalitetit ekonomik dhe korrupsionit, edhe me mbështetjen e kthimit në vend të shqiptarëve që kanë studiuar jashtë vendit, garantimin e lidhjes së Internetit për shkollat, si dhe nxitjen e zhvillimit në fusha, si pyllëzimi, eko-turizmi dhe energjia. Gjatë pritjes në Këshillin e Ministrave, përvec falenderimeve për këtë organizatë që varet nga OKB-ja, Kryeministri Berisha theksoi vullnetin e qeverisë që drejton, për bashkëpunim në projektet që ai i cilësoi si shumë të rëndësishme. "Lufta ndaj informalitetit është një ndër pikat themelore të programit të qeverisë", përkujtoi Kryeministri, ndërsa nënvizoi nevojën e vendit për "thithjen e trurit", dhe kontributin e shqiptarëve që studiojnë në Perëndim. Pikat e bashkëpunimit: • Luftës kundër extra-legalitetit (informalitetit ekonomik) dhe korrupsionit; • Garantimit të lidhjes së Internetit për shkollat në Shqipëri; • Mbështetjes së kthimit dhe vënies në punë të ekspertizës dhe njohurive të shqiptarëve jashtë vendit, nëpërmjet nismave për "Thithjen e Trurit"; • Nxitjes së një zhvillimi të qëndrueshëm në fusha të tilla, si pyllëzimi, eko-turizmi dhe energjia e ripërtëritshme.

Komentet e përdoruesve