Energjia elektrike ndez qirinjtë në fakultete

Kriza energjetike, e cila ka pëfshirë të gjithë vendin ka shtuar kaosin në auditoret e fakulteteve të Tiranës, ku që prej 3 tetorit mësimi zhvillohet me turne, për shkak të shtimit të numrit të studentëve dhe mungesës së auditorëve. Turnit të dytë dhe të tretë të studentëve, u takon t’a kryejnë mësimin nën dritën e qirinjve, për shkak të ndërprerjes së energjisë elektrike për orë të tëra. Gjendja më e vështirë, paraqitet në Fakultetin Ekonomik, Universitetin Politeknik, tek Fakulteti i Shkencave të Natyrës dhe në Fakultetin e Inxhinierisë së Ndërtimit. Në këta fakultete, turni i tretë i studentëve, mbaron pas orës 21 të mbrëmjes. Por, energjia elektrike nuk nevojitet vetëm kur errësohet. Tek Shkencat e Natyrës, programi mësimor është i bazuar mbi punën në laboratore dhe kështu është e domosdoshme energjia elektrike edhe gjatë ditës. Për këtë arsye dekani i fakultetit të Shkencave, Llukan Puka, ka kërkuar rishikim të orarit dhe përmbledhjen e orëve laboratorike në oraret kur ka drita. Ndërkohë ky mendim kundërshtohet nga dekanët e tjerë, pasi sipas tyre univeristetet duhet të kenë energji elektrike në çdo kohë, sikurse kanë spitalet dhe institucionet e tjerë të rëndësishëm. Për shkak të mungesës së energjisë elektrike, mësimi bëhet dhe nën dritën e qirinjve, sikurse rilandasit shkruanin dikur veprat e tyre... Nuk kanë munguar rastet kur dritat janë ndërprerë pasditeve dhe mësimdhënia ka vazhduar nën dritën e qirinjve. Dekanët e fakulteteve, së bashku më rektorin e Universitetit të Tiranës, i kanë dërguar një letër-kërkesë KESH-it për furnizimin e universiteteve me linja të veçanta, por deri dje nuk kishin marrë asnjë përgjigje nga ky institucion. Por ata, mbi të cilët bie barra e gjithë këtij kaosi të krijuar, janë studentët. Sidoqë të vejë puna, pedagogët do ta realizojnë planin mësimor, qoftë edhe nën dritën e qirinjve, por studentët janë ata të cilët do vujanë cilësinë e mësimdhënies me këto kushte. Qeveria studentore, ia delegon fajin për situatën e krijuar stafit akademik, i cili sipas saj nuk menaxhon si duhet oraret e dritave.

Komentet e përdoruesve