Ashkalinjët nga Beogradi të vullnetshëm të kthehen në Mitrovicë

Disa pjesëtarë të komunitetit ashkali janë kthyer disa vite më pas për të vizituar pronat e tyre në lagjet e Mitrovicës ku kanë banuar. Këta ashkali që janë të shpërngulur në Beograd, pas kësaj vizite në lagjen Stan Tërg, Tunel të Parë dhe në lagjen “2 Korriku”, janë shprehur të vullnetshëm që të kthehen në shtëpitë e tyre. Ata kanë vizituar edhe Kuvendin Komunal, dhe kanë biseduar për problemet e tyre me kryetarin e ri të kësaj komune, Mursel Ibrahimi dhe zëvendësen e tij, Fatmire Berisha. Zyrtarët e komunës u kanë premtuar të shpërngulurve nga Mitrovica se do të bëjnë përpjekje maksimale që t’ua mundësojnë kthimin në pronat e veta në mënyrë sa më të mirë dhe t’u krijojnë kushte për jetesë. Kuvendi i Komunës së Mitrovicës, kanë thënë zyrtarët, do të përkujdeset edhe për integrimin e të kthyerve dhe nuk do të lejojë që çdo gjë të merr fund me kthimin. Derisa kryefamiljarët e ashkalinjëve kanë qenë të kënaqur me vizitën dhe mikpritjen që ua kanë bërë edhe fqinjët e tyre shqiptarë, e edhe një herë kanë shprehur vullnetin dhe dëshirën e tyre për t’u kthyer në trojet ku kanë jetuar më parë dhe kërkuan nga udhëheqja komunale që t’ju mundësohet kthimi sa më shpejtë që është e mundur.

Komentet e përdoruesve