Pollo nënshkruan marrëveshjen e bashkëpunimit me ministrinë italiane të Arsimit

Ministri i Arsimit dhe Shkencës, Genc Pollo dhe ministrja italiane e Arsimit, Letizia Moratti nënshkruan dje deklaratën e bashkëpunimit. Nënshkrimi i deklaratës është në vijim të projekteve me vlerë, disa miliona euro. Sipas dy ministrave kjo nismë përbën një bazë të rëndësishme për të ardhmen në çështjet e arsimit dhe shkencës. Deklarata e bashkëpunimit përfshin trajnim për mësuesit e sistemit parauniversitar, lehtësim procedurash për njohjen e titujve të studimit për sistemin parauniversitarë dhe universitarë, si dhe mundësi për trajnime pasuniversitare për të sapodiplomuarit. Sipas marrëveshjes së dy ministrave u ra dakord ngritja e një grupi pune, për të bërë analizën dhe përcaktimin e nismave të bashkëpunimit. Sipas marrëveshjes, do të bëhet promovimi i trajnimit dhe kualifikimit të mësuesve në arsimin fillor dhe të mesëm. Në marrëveshje parashikohet gjithashtu, pjesëmarrja e shkollave shqiptare në projektet e binjakëzimit elektronik midis shkollave e-Ponte, të njohura në Itali; përgatitjen e teksteve shkollore, informatizimin e mjediseve, trajnimin e vazhdueshëm të mësuesve të gjuhës italiane në shkollat shqiptare nëpërmjet IUL. Binjakëzim do të ketë edhe për universitetet shqiptare, të cilët do të lidhen në rrjet me universitetet italiane si dhe me ato të rajonit ballkanik.