KMDLNJ konsideron se të drejtat e REA në veri të Kosovës po shkelen në vazhdimësi

Me anë të një prononcimi për media, Këshilli për Mbrojtjen e të Drejtave dhe Lirive të Njeriut – KMDLNJ, thotë se “të zhvendosurit romë, hashkali dhe egjiptianë, të cilët që nga periudha e pasluftës në Kosovë më 1999 po qëndrojnë në kampet në veri të Kosovës, jetojnë në kushte tejet të vështira, të ekspozuar edhe ndaj rrezikut të madh jetësor nga përqindja e madhe e plumbit në gjak. Kjo nuk është asgjë e re dhe njëkohësisht është e ditur për të gjithë. Por, deri më tash nuk është ndërmarrë asgjë serioze për zgjidhjen e çështjes së tyre”. “Për gjendjen e mjerë të tyre ata kanë reaguar disa herë te institucionet vendore dhe ndërkombëtare në Kosovë dhe së fundi u janë drejtuar edhe Gjykatës Evropiane për të Drejtat e Njeriut me padi kundër UNMIK-ut. Por, këto ditë kjo gjykatë e ka hedhur poshtë padinë e tyre” vazhdon prononcimi. “KMDLNJ deri më tani disa herë ka reaguar për gjendjen e mjerë të të zhvendosurve RAE në këto kampe dhe ka kërkuar ndërmarrjen e masave të menjëhershme për zgjidhjen e çështjes së tyre. Mirëpo, për fat të keq, organet kompetente të pushtetit janë treguar të shurdhër në këtë drejtim”. “Rastin e fundit të mosshqyrtimit të padisë së komunitetit RAE kundër UNMIK-ut drejtuar Gjykatës Evropiane për të Drejtat e Njeriut, përkatësisht hedhjen poshtë të kësaj padie, KMDLNJ e konsideron si plotësisht të paarsyeshme e të paargumentuar dhe si vazhdim të shkeljes së të drejtave të të zhvendosurve RAE në kampet në veri të Kosovës. Ata, sikurse edhe qytetarët e tjerë të Kosovës meritojnë jetë të dinjitetshme në Kosovë”, përfundon prononcimi i KMDLNJ-së.

Komentet e përdoruesve