Personat me aftësi të kufizuara kërkojnë transport të përhershëm urban

Në një tryezë të rrumbullakët të organizuar dje nga ana e organizatës “Handikap Kosova” personat me aftësi të kufizuara kanë kërkuar që të kanë qasje të përhershme në trafikun urban. Organizatat pjesëmarrëse në tryezë kërkuan nga Drejtorati i Shërbimeve Publike dhe nga Ministria e Transportit që një prej pikave të transportit urban të jetë edhe parku i qytetit “Gërmia”. Sipas udhëheqësve të organizatës “Handikap Kosova” tashmë është caktuar agjenda e projektit “Krijimi i qasjes së personave me aftësi të kufizuar në trafik urban”, në Komunën e Prishtinës. Sipas koordinatorit të kësaj organizate, Gëzim Abazi, është caktuar një orar, i cili do të shërbejë në bazë të fillimit të vitit të ri shkollor. Ai gjithashtu ka shtuar se “ende nuk është vendosur për datën kur do të fillojë zbatimi i këtij projekti”. Megjithatë, ai ka sqaruar se data e mundshme do të përcaktohet së shpejti. Nga ana e tij, Afrim Gashi, në cilësinë e përfaqësuesit të Drejtoratit për Shërbime Publike, ka thënë së e ka marrë me shumë seriozitet këtë projekt, duke shtuar se kjo kategori e njerëzve janë lënë anash. Ministria e Shërbimeve Publike e cila njëkohësisht edhe do të jetë bartëse e këtij projekti në fjalë do të jetë përgjegjëse edhe për gjetjen e mjeteve për zbatimin e tij.

Komentet e përdoruesve