Zgjedhjet komunale në Kosovë me lista të hapura

Të hënën anëtarët e Forumit të Zgjedhjeve kanë prezantuar para anëtarëve të Komisionit për Çështje Juridike, Legjislacion dhe Kornizë Kushtetuese Propozimrregulloren për zgjedhjet për kuvendet komunale dhe kanë dëgjuar vërejtjet e deputetëve për rregullativën e re për zgjedhjet. E re është se zgjedhjet e ardhshme komunale do të bëhen me lista të hapura dhe me sistem proporcional. Qytetarët do të kenë mundësi të votojnë partinë a koalicionin partiak, si dhe të votojnë një a më shumë kandidatë në listën zgjedhore të subjektit të dhënë zgjedhor. Fuqia e partisë do të varet nga votat që i merr subjekti përkatës, kurse votat e kandidatëve në atë listë do të shërbejnë për radhitjen e kandidatëve në përbërjen e asambleve komunale. Propozimrregullorja e UNMIK-ut për zgjedhjet komunale parasheh stimulim të veçantë përfaqësues për minoritetet dhe gratë. Kështu, 30 përqindëshi për gratë garantohet edhe nëse kandidatet nuk fitojnë numrin e mjaftueshëm të votave. Megjithëse anëtarët e Komisionit Legjislativ rregullativën e propozuar për zgjedhjet komunale e kanë vlerësuar avancim serioz në planin e demokratizimit të procesit zgjedhor, kanë paraqitur vërejtje të shumta në përmbajtjen e kësaj rregulloreje. Komisioni Legjislativ, po në këtë mbledhje ka filluar shqyrtimin e Projektligjit kundër shpifjes.

Komentet e përdoruesve