Qytetarët e Korçës protestojnë kundër rritjes së çmimeve të energjisë

Klubi qytetar i Lëvizjes MJAFT! në qytetin e Korçës zhvilloi dje përpara Prefekturës së qytetit një protestë masive për të kundërshtuar rritjen e çmimeve të energjisë elektrike. Nga protestat e meparshme te MJAFT Pak para se në Tiranë të zhvillohej një takim mes drejtuesve të Lëvizjes MJAFT! dhe ministrit të Ekonomisë, Tregtisë dhe Energjetikës z. Genc Ruli, në qytetin e Korçës, qindra qytetarë, shprehën në mënyrë groteske pakënaqësinë e tyre ndaj çmimeve të larta të energjisë elektrike. Qindra qytetarë të këtij qyteti, ku arkëtimet e tejkalojnë shifrën 95 %, ndërtuan dy mure me simbolika krejt të kundërta. I pari ishte një mur i bardhë, ku qytetarët ngjitën qindra fatura të paguara të energjisë, ndërsa i dyti ishte një mur krejt i zi, që simbolizoi shërbimin e dobët të KESH-it dhe "përgjigjen" që kjo korporatë i bën arkëtimeve të larta në këtë qytet i cili ndodhet çdo ditë në errësirë për të paktën 5 orë. "Me anën e kësaj proteste ne duam t'i drejtojmë qeverisë dhe KESH kërkesën për të patur parasysh nevojat dhe interesin e qytetarëve të thjeshtë përpara se të ndërmarrin një nismë që rëndon mbi ta", tha Margarita Buxhaku, aktiviste e Lëvizjes MJAFT! në qytetin e Korçës. Ndërkohë, në Tiranë Lëvizja MJAFT! i shprehu dje (e mërkurë, 29 mars) ministrit të Ekonomisë, Tregtisë dhe Energjetikës z. Genc Ruli shqetësimin e qytetarëve shqiptarë për ngritjen e çmimeve të energjisë elektrike. Drejtues të MJAFT!, i dorëzuan ministrit, gjatë këtij takimi që u zhvillua në zyrën e tij ku ishte i pranishëm edhe drejtori i KESH Andi Beli, një peticion me firmat e mijëra qytetarëve që e kundërshtojnë rritjen e çmimeve të energjisë. "Numri i firmave në këtë peticion është simbolik në krahasim me numrin real të të gjithë atyre qytetarëve të cilët nuk janë dakord me propozimet e KESH", tha Erion Veliaj (MJAFT). Pasi dëgjoi të gjitha argumentet dhe shqetësimet e shfaqura nga MJAFT! ministri Ruli i falënderoi drejtuesit e kësaj lëvizjeje dhe e përgëzoi këtë nismë. Madje ai bëri një premtim, në prani të medias së shumtë që e shoqëruan këtë takim: "Veprimet që ne do të ndërmarrim", tha ai, "do të jenë në funksion të zgjidhjeve të atyre shqetësimeve që ju shprehni".

Komentet e përdoruesve