Seminar Kombëtar për Menaxhimin e Kimikateve

Ministria e Mjedisit, Pyjeve dhe Administrimit të Ujrave, mbështetur nga UNITAR (Instituti i Kombeve të Bashkuara për Trajnim dhe Kërkim) dhe me mbështetjen financiare të Bashkimit Evropian dhe të Qeverise Zvicerane, organizoi seminarin kombëtar dy ditor me titull “Profili Kombëtar për Menaxhimin e Kimikateve dhe zbatimin e Strategjisë Ndërkombëtare për Menaxhimin e Kimikateve në Shqipëri”. Takimi u përshendet nga Zv.ministri i Mjedisit, Pyjeve dhe Administrimit të Ujrave Aleksander Garuli, i cili theksoi se shumë instrumenta të politikës kombëtare i referohen, ndër të tjera, dhe aspekteve menaxhuese të kimikateve në vend, dhe për këtë arsye Ministria e Mjedisit ka marrë rolin e drejtuesit kryesor në çështjen e menaxhimit të kimikateve në një mënyrë sa më efektive dhe pa cënuar mjedisin dhe shëndetin e njerëzve. Ndërsa përfaqësuesi i UNITAR, Hans de Kruijf, në fjalën e tij përshëndetëse, ndër të tjera përmendi se Shqipëria tashmë ka përgatitur draftin e Profilit Kombëtar për Menaxhimin e Kimikateve, duke përfunduar hapin e parë të këtij programi, dhe po shkon drejt zbatimit të hapit të dytë që është përgatitja e programit për zhvillimin e këtij Profili. Ky proces po kryhet aktualisht në 17 vende dhe Shqipëria është vendi i fundit ku po zhvillohet seminari për krijimin e prioriteteve në kuadër të përgatitjes së Profilit Kombëtar për Menaxhimin e Kimikateve. Gjithashtu, z. Kruijf theksoi se pjesëmarrja e të gjithë aktorëve të interesuar në këtë takim është një tregues stimulues për të arritur menaxhimin e qëndrueshem të kimikateve në vend. Më pas takimi vazhdoi me prezantimet e ndryshme mbi Aktivitetet Kombëtare lidhur me menaxhimin e kimikateve në vend. Në seminar marrin pjesë përfaqësues të Ministrive të linjës, nga Instituti i Mjedisit dhe institucione te tjera akademike-shkencore, nga shoqeria civile si dhe aktorë të tjerë të fushës. Qendra Rajonale e Mjedisit Shqipëri

Komentet e përdoruesve