Avokati i Popullit mbështet Koalicionin për Nxitjen e pjesmarrjes së Grave dhe të Rinjve në Politikë

Avokati i Popullit, z. Ermir Dobjani u takua javëne kaluar në zyrën e tij me një përfaqësi të Koalicionit për Nxitjen e Pjesmarrjes së Grave dhe të Rinjve në Politikë, të cilët i dorëzuan atij një peticion ku argumentojnë dhe kërkojnë realizimin e një kuote prej jo më pak se 30 përqind për pjesëmarrjen e grave dhe të rinjve në politikë. Takimi i Avokatit te Popullit me perfaqesuesit e Koalicionit per pjesmarrjen e grave dhe te rinjve ne politike © CRCA Përfaqësia përbëhej nga znj. Elona Gjebrea, Drejtore e Qendrës për Popullsi dhe Zhvillim, z. Altin Hazizaj, Drejtor i Qendrës për të Drejtat e Fëmijëve në Shqipëri, znj. Valbona Kaso nga Forumi i Pavarur i Gruas Shqiptare, si dhe Ekspertja ligjore e grupit, znj. Brizida Gjikondi. Avokati i Popullit shprehu mbështetjen e plotë institucionale në favor të kësaj nisme, realizimi i së cilës “do të çojë në emancipimin e shoqërisë shqiptare”. Në raportin vjetor të Avokatit të Popullit për vitin 2005, vihet në dukje fakti se edhe organizmat ndërkombëtare kanë rekomanduar që shteti shqiptar duhet të ndërmarrë hapa të menjëhershme për ndryshimin e sjelljes së publikut ndaj pjesëmarrjes së gruas në çështjet publike, si dhe të marrë në konsideratë miratimin e një politike pozitive veprimi në këtë drejtim. “Shteti duhet të marrë masat e duhura për të siguruar pjesëmarrjen efikase të gruas dhe të rinjve në jetën politike, publike si dhe në sektorë të tjerë të shtetit”, u shpreh Dobjani. "Me lejoni qe ne emer te Koalicionit t'ju falenderoj për mbështetjen tuaj për këtë nismë të Koalicionit si dhe për shqetësimet e vazhdueshme që ju keni shprehur për situatën e të drejtave të grave dhe të rinjve në Shqipëri. - tha z. Altin Hazizaj, Drejtor i CRCA - Me këtë iniciative ne duam që t'i japim një mundësi të gjithë grave dhe të rinjve që të thonë edhe ata fjalën e tyre në politikën shqiptare. Ne gjithashtu do të dëshironim që ju, si Avokat i Popullit të Shqipërisë, brenda kompetencave kushtetuese që ju jep ligji, t'i rekomandonit autoriteteve shqiptare që të vendosin kuotën 50 me 50 për përfaqësimin e gruas në të gjitha strukturat ekzekutive." Avokati i Popullit konsideron këtë nismë si një hap në drejtimin e duhur edhe me deklarimin e tij në Raportin e fundit vjetor të paraqitur në Parlament që “Partitë Politike do kishin më tepër mundësi për të përfshirë në listat e tyre gratë dhe figurat e tyre më aktive dhe nga profesione të tilla, si juriste, ekonomiste, sociologe, etj, me qëllim që parlamenti të jetë sa më cilësor në veprimtarinë e tij”. Si institucion kombëtar me status kushtetues në mbrojtje të të drejtave dhe lirive të njeriut në Shqipëri, “Avokati i Popullit do të japë ndihmesën e tij në mbështetje të kësaj nisme, nëpërmjet hartimit të rekomandimeve, drejtuar strukturave përkatëse dhe do ta ndjekë problemin në vijimësi”, u shpreh z. Dobjani.

Komentet e përdoruesve