Aktivitet masiv rinor - “Jeto i gjelbërt“

Shoqata ”Intelektualët e rinj, Shpresë“ (IRSH), Lëvizja MJAFT, në bashkëpunim me Bashkinë Shkodër si dhe me mbështetjen e Firmës „BERTONI“ si dhe Hotel Argenti - Velipoje do të organizojnë me datën 30 Prill – 1 Maj 2006 në plazhin e Velipojës në Shkodër, një aktivitet masiv rinor me moton:“Jeto i gjelbërt“. Kjo iniciativë synon ndërgjegjësimin e të rinjve si dhe Qeverisjes lokale dhe sektorit privat për mbajtjen pastër të ambientit si dhe për ruajtjen dhe kujdesin ndaj mjedisit me synim shtimin e sipërfaqeve të gjelbërta. Organizatorët kanë përzgjedhur plazhin e Velipojës me qëllimin që mesazhi të jetë sa më i qartë në hapje të sezonit turistik për vitin 2006. Peizazhi natyror që ofron Plazhi i Velipojës ku rritja e ndërtimeve në mënyrë pa kriter dhe zvogëlimi i hapësirave të gjelbërta janë një kërcënim serioz për zhvillimin e turizmit, po ashtu edhe një kërcënim serioz për ruajtjen e biodiversitetit si dhe resurseve natyrore që ofron plazhi i Velipojës. Rreth 300 të rinj të cilët kane shprehur gatishmërinë e tyre për të marrë pjesë në këtë aktivitet do të nisen në ora 16.00 nga sheshi 2 Prilli në drejtim të Plazhit të Velipojës. Akomodimi i tyre do të bëhet në Hotel Argenti ku do te zhvillohet gjithashtu edhe mbrëmja artistike. Ne këtë mbrëmje do të marrë pjesë edhe këngëtarja e njohur Çiljeta Çiljaga e cila do të këndojë muzike live për të pranishmit. DJ i ardhur nga Londra do të krijojë sfondin muzikor të mbrëmjes i cili do t’i shoqërojë të rinjtë deri në orët e para të mëngjesit të 1 Majit. Gjatë paradites së 1 Majit është planifikuar që të rinjtë të përshkojnë të gjithë se bashku bregun e detit duke bërë pastrimin e tij si dhe duke larguar te gjithë papastërtitë. Kjo iniciativë do të pasohet nga iniciativa të tjera ambientaliste gjatë muajit Maj ku ndër të cilat mund të përmendim Debatin Publik mbi çeshtjet e ambientit në Shkodër që do të zhvillohet me 17 Maj. Për çdo informacion ju lutemi të kontaktoni me zyrën e qendrës “IRSH”, tel: 022 484 76 ose email: irsh_centre@yahoo.com

Komentet e përdoruesve