Peshkopia mbyll fushatën “Jeto Gjelbër”

Karvani i mjedisit, në kuadër të fushatës kombëtare "Jeto Gjelbër", u mbyll në qytetin e Peshkopisë. Përfaqësues të pushtetit vendor, qytetarë të qytetit verior, nxënës të shkollave të mesme si dhe aktivistët e Lëvizjes MJAFT! diskutuan në këtë qytet disa nga problemet më të mprehta mjedisore. "Jeto Gjelber" © mjaft Të pranishmit nënvizuan situatën kritike të pyjeve, erozionit të tokës dhe të depozitimit të mbetjeve urbane. Kryetari i Bashkisë së qytetit të Peshkopisë, z. Ilir Krosi, falënderoi lëvizjen MJAFT! që kishte zgjedhur pikërisht mjedisin si temë të fushatës së saj. Edhe në këtë qytet, MJAFT! dhuroi 20 kosha për hedhjen e mbeturinave dhe pastroi njërën nga rrugët kryesore. Fushata kombëtare "Jeto Gjelbër", u mbyll pikërisht në qytetin e Peshkopisë. Ajo 'udhëtoi' në 10 qytete të Shqipërisë, në jug dhe në veri, ku jo vetëm u njoh me problemet e mëdha mjedisore por krijoi kushte edhe për një ballafaqim real mes autoriteteve të pushtetit vendor dhe banorëve të këtyre qyteteve në debate, ku nuk munguan edhe momentet e nervozizmit nga të gjitha palët. Pavarësisht dallimeve të ndryshme kulturore, natyrore, gjeografike e historike mes këtyre qyteteve, një e përbashkët e hidhur duket se i bashkon ato: që të gjitha janë tejet të ndotura. Shqipëria, për fat të keq vazhdon të jetë kështu, vendi më i ndotur i Europës.

Komentet e përdoruesve