Krimet me motive etnike në rënie e sipër në Kosovë

Përfaqësuesi special i sekretarit të përgjithshëm të OKB-së në Kosovë (PSSP), Søren Jessen-Petersen, sot u bëri thirrje të gjitha palëve që të përmbahen nga përhapja e keqinformimit rreth situatës së sigurisë në Kosovë, posaçërisht lidhur me bashkësinë e serbëve të Kosovës. Søren Jessen-Petersen “Me shqetësim kam vërejtur deklarata të herëpashershme nga qarqe të caktuara që rrezikojnë ta krijojnë një klimë të frikës dhe pasigurisë ndër serbët e Kosovës,” tha PSSP. “Shumë shpesh motivi etnik supozohet si shkak për krime thjesht sepse viktimat rastisin të jenë nga bashkësia e serbëve të Kosovës. Duke pasur parasysh që gjithmonë i dënojmë sulmet ndaj cilitdo qytetar, deklaratat e natyrës dezorientuese nuk ndihmojnë dhe janë në të vërtetë kundër interesave të serbëve të Kosovës. Ky lloj i keqinformimit jo vetëm që e shuan shkallën e besimit të tyre, por ka ndikim negativ në marrëdhëniet ndëretnike.” Të dhënat për krime për çerekun e parë të këtij viti (janar – mars 2006) tregojnë për rënie të dukshme në krimet që ka mundësi të jenë të motivuara etnikisht, kjo do të thotë, rastet kur mundësia e një motivi etnik ende nuk është përcaktuar. Në krahasim me 72 incidente të regjistruara në periudhën janar – mars 2005, në periudhën e njëjtë të këtij viti janë regjistruar vetëm 19 incidente të tilla. Prej këtyre incidenteve, në 12 incidente përfshiheshin viktimat serbe të Kosovës, në 6 viktimat shqiptare të Kosovës dhe në një rast një viktimë kroat i Kosovës. Ndër viktimat serbe të Kosovës, një rast ishte tentim vrasje, dy sulme, tri kërcënime, dhe gjashtë raste të dëmit penal. Policia e UNMIK-ut i ka analizuar së voni 1,408 autokolona të serbëve të Kosovës që u shoqëruan nga Shërbimi Policor i Kosovës (SHPK) prej janarit e deri në fillim të majit të këtij viti. U konstatua se kishte pasur gjashtë incidente të gjuajtjes së gurëve në këto autokolona dhe policia kishte bërë pesë arrestime në ato raste. Në dhjetor 2005, në bazë të udhëzimeve të PSSP-së, policia nisi “Operacionin siguria e sforcuar” që përqendrohej në bashkësitë dhe lokalitetet e cenuara. Ky operacion ka përfshirë 85,502 pika kontrollimi për automjete, 94,315 patrulla në këmbë/me vetura dhe 18,758 vizita të policisë në varreza. Janë ekzekutuar 1,269 urdhër arreste, 1,735 persona janë arrestuar për krime të ndryshme dhe janë konfiskuar 476 armë. Ky operacion i intensitetit të lartë policor ka kontribuar dukshëm, ndër të tjera, në uljen e shkallëve të krimit, posaçërisht lidhur me bashkësitë pakicë. Për shkak të perceptimit të vazhdueshëm të pasigurisë ndër serbët e Kosovës, PSSP ka kërkuar nga komisionari i policisë që ta shtojë numrin e policëve ndërkombëtarë në zona të pakicave për t’i mbështetur përpjekjet e SHPK-së për parandalimin e incidenteve dhe për të ndihmuar që të shtohet besimi në bashkësi.

Komentet e përdoruesve