SPANN dhe Opstanok kërkojnë Program Kombëtar për Parandalimin e Shprehive

Me rastin e 31 majit, Ditës Ndërkombëtare Kundër Duhanit , Unioni për Parandalimin e Alkoolizmit, Nikotinizmit dhe Përdorimit të Drogave në Maqedoni dhe shoqata mjedisore "Opstanok" kërkuan miratim urgjent të një Programi Kombëtar për Parandalimin e Shprehive, që do t’i kontribuojë shtetit të përqendrojë fokusimin nga shërimi i pasojave në parandalimin e tyre. Në një konferencë për shtyp, të mbajtur në OJQ-në Infocentre, Gjorgi Hadzi Vaskov, President i SPANN-it, paraqiti informacionin që thotë se çdo nëntë sekonda në botë humbet një jetë njeriu si shkak i kushteve shëndetësore që vijnë nga tymosja e duhanit. Gjithashtu, ka informata shqetësuese që numri i femrave që tymosin duhan është po ashtu në rritje, marrë parasysh ndikimin negativ që ka duhani në fëmijët e palindur gjatë shtatzënisë. Sipas informatave në dispozicion që ka Unioni, numri i duhanxhinjve në Maqedoni është në ngritje, që është e kundërt me trendet mbizotëruese globale Aktualisht, Maqedonia radhitet e dyta në Evropë për sa i përket konsumimit të prodhimeve të duhanit për kokë banori, menjëherë pas Polonisë. Sipas vlerave të përafërta, në Maqedoni ka rreth 700,000 duhanxhinj, apo rreth 35% e popullatës së gjithmbarshme. Megjithatë, Hadzi-Vaskov thotë se, për shkak të mungesës së një Strategjie Kombëtare, askush në vend nuk është i angazhuar në hulumtim sistematik apo statistika, gjë që parandalon veprimin në nivelin e planifikimit të aktiviteteve. SPANN dhe "Opstanok" apeluan për zbatim të plotë dhe të qëndrueshëm të Ligjit mbi Parandalimin e Pirjes së Duhanit (miratuar 11 vjet më parë), i cili pothuajse nuk zbatohet fare sot, i cili, sipas Hadzi-Vaskov, "…tregon vëllimin e sundimit të ligjit në Maqedoni". Dy organizatat gjithashtu kërkojnë që të gjitha institucionet arsimore dhe shëndetësore të shpallen zona ku ndalohet tymosja e duhanit. Hadzi-Vaskov theksoi edhe një herë që në mungesë të mjeteve financiare, Unioni nuk do të jetë në gjendje të zbatojë një segment shumë të rëndësishëm të programit të tij, posaçërisht projektin "Një Duhanxhi më Pak ", për të cilin publiku ka shprehur interesim shumë të madh.