Mundësi të reja për konkurencën e produkteve shqiptare në tregun ndërkombëtar

Një nismë e Organizatës Holandeze për Zhvillim (SNV) dhe mbështetur nga Ministria e Bujqësisë dhe Ushqimit, ka mbledhur në një tavolinë pune në datat 20 dhe 21 Korrik 2006; prodhues, përpunues dhe tregëtarë të vajit të ullirit në Shqipëri. Është hera e parë që të gjithë këta aktorë ulen së bashku për të analizuar pozicionin e tyre në treg dhe për të gjetur rrugët më të favorshme të futjes në tregun ndërkombëtar që zotërohet kryesisht nga italianët, grekët dhe spanjollët. Shqipëria ka mundësi të mira për eksport të vajit të ullirit, por ai duhet të jetë i standarteve europiane. Aktualisht në Shqipëri ka rreth 73 mijë familje që merren me kultivimin e ullinjve si dhe 150 linja prodhimi që përpunojnë vajin e ullirit. Qëllimi i këtij aktiviteti që po mbahet në Chateau Linza në Tiranë është të nxisë bashkëpunimin midis aktorëve që veprojnë në të njëjtën zinxhir tregu për të rritur aftësitë e tyre për të konkuruar në tregun ndërkombëtar. Në fjalën e tij, Ministri i Bujqësisë Jemin Gjana nënvizoi se “nëse dëshirojmë ta bëjmë bujqësinë pjesë të ekonomisë së tregut, ne duhet të njohim, të zhvillojmë dhe të zbatojmë bashkëpunimin vertikal. Është jetike që prodhuesit shqiptarë të bashkohen pasi me uljen e tarifave doganore duhet të ulen edhe kostot për të qenë më konkurues në treg”- tha z. Gjana. Pjesëmarrësit në takim do të njihen me Metodën e Zinxhirit të Vlerës- një metodë e sjellë nga ekspertët e SNV-së , e cila ka filluar të zbatohet një vit më parë në rajonin e Fierit. Kjo metodë ka në bazë parimin e bashkëpunimit vertikal midis ndërmarrjeve që merren me nxjerrjen e një produkti në treg që i lidh ato nga një anë me prodhuesit (fermerët), përpunuesi, tregëtarët dhe në anën tjetër me konsumatorët. Bashkëpunimi mund të bëhet në forma të ndryshme si psh : në shkëmbim informacioni, sondazhe tregu, kontrollin e cilësisë, marëveshje për çmimet, asistencë teknike, etj.

Komentet e përdoruesve