Tryezë e rrumbullakët për regjistrat e shkarkimit dhe transferimit të ndotësve

Qendra Rajonale e Mjedisit REC Shqipëri, në bashkëpunim me Ministrinë e Mjedisit, Pyjeve dhe Administrimit të Ujërave, në kuadër të projektit “Përmirësimi i praktikave të pjesëmarrjes publike – Hapa të mëtejshëm për zbatimin në praktikë të Konventës së Aarhusit në vendet e Europës Juglindore”, i mbështetur nga Ministria e Punëve të Jashtme të Vendeve të Ulëta, organizuan një tryeze pune mbi Regjistrat e Shkarkimit dhe Transferimit të Ndotësve, të njohura si PRTR (inicialet në gjuhen angleze). Në tryezë merrnin pjesë përfaqësues të Ministrisë së Mjedisit, Pyjeve dhe Administrimit të Ujerave, të Inspektoriatit mjedisor, ministrive të linjës, institucioneve të ndryshme të ngarkuara me monitorimin e mjedisit, përfaqesues të institucioneve akademike, të sektorit të biznesit dhe Dhomës së Tregetise dhe Industrisë Tiranë, si dhe përfaqësues të REC nga Hungaria dhe Shqipëria. Në takim u prezantua një material i përgatitur për vlerësimin e gjendjes lidhur me PRTR në Shqipëri, si dhe një përshkrim i proceseve rajonale, evropiane dhe përvojave në vende të ndryshme lidhur me këto regjistra. Protokolli i PRTR është ratifikuar nga Kuvendi i Shqipërisë në Qershor 2006. Ky hap i ndërmarrë do të thotë një sërë detyrimesh, tashmë për zbatimin në praktikë të këtij protokolli. Por zbatimi praktik i këtij protokolli kërkon një bashkëpunim të ngushtë ndërmjet autoriteteve mjedisore, biznesit dhe strukturave për monitorimin e mjedisit. Ky ishte një nga përfundimet e arritura nga diskutimet e pjesëmarrësve. Krahas me përfundimet e tjera, do të ndihmojnë në hartimin e hapave të tjerë vijues për procesin e zbatimit të Protokollit dhe vendosjes së bashkëpunimit ndërmjet të gjithë aktorëve të përfshirë në të. REC Shqipëri do të vijojë dhe me aktivitete të tjera që lidhen me PRTR apo dhe me çështje të tjera të zbatimit në praktike të Konventes së Aarhusit në Shqipëri.

Komentet e përdoruesve