BE, Qytetarët më pranë pushtetit lokal

Demokratizimi i pushtetit lokal është një hap më tepër drejt Bashkimit Evropian. Për këtë arsye, qytetarët duhet të njihen më tepër me të drejtat e tyre. U mbyll projekti: "Një qytetar i informuar, është një qytetar i lirë". Ai u shtri në qytetet Peshkopi, Strugë, Gostivar. Ky projekt u financua nga Bashkimi Evropian përmes programit CARDS 2003 për zhvillimin e shoqërisë civile. Për më shumë se 18 muaj, me mbështetjen e SNV (Organizata hollandeze për zhvillim), Qendra e Edukimit dhe Komunikimit Peshkopi dhe partnerët e saj ADI dhe Mak-Sonce, përkatësisht në Gostivar dhe Strugë në Maqedoni punuan intensivisht, së bashku me shoqërinë civile dhe pushtetet vendore të zonave te fokusuara, për të realizuar ndërhyrje që do ta sillnin qytetarin më pranë vendimmarrjes dhe do ta bënin më ndërvepruese marrdhënien ndërmjet qytetarëve dhe pushtetit vendor me synimin për të arritur një vendimmarrje në interes të qytetarëve. Gjatë 18 muajëve u zhvilluan mbi debate, anketime, tryeza të rrumbullakta me mbi 1000 persona nga këto tri qytete. "U përgatit një dokumentar dhe u shpërndanë mbi 20 tituj, broshura informative për BE dhe kushtet për antarësimin në BE. Duke iu referuar anketimit të dytë, që zhvilluan në përfundim të projektit, mund të themi se arritëm të realizojmë një përmirësim të informimit rreth 30%, nëse do ta shprehnim me shifra" - tha Violeta Kola, koordinatore e projektit. Projektet gjinore, punësimi, zhvillimi i arsimit, zhvillimi i turizmit, problemet urbane, mbështetja për grupet në nevojë etj. ishin objekt i diskutimit në këto debate.

Komentet e përdoruesve