AI – Zgjidhja për Kosovën e mundshme vetëm përmes konsultimeve me pakicat dhe shoqërinë civile

Amnesty International ka shprehur brengën e saj në lidhje me lajmin që, në rast se nuk arrihet kompromisi, vendimi mbi statusin përfundimtar të Kosovës mund të imponohet dhe të diktohet nga jashtë, pa konsultime të nevojshme. AI është e brengosur pasi që të dyja palët në negociata kanë dështuar to arrijnë një marrëveshje në një çështje të vetme të rëndësishme “,... zgjidhja e imponuar do të mund të thellojë edhe më shumë vijat e tensionit brenda Kosovës, të cilat do të mund të drejtonin kah shkeljet e reja të drejtave të njeriut”. Amnesty International kërkon që marrëveshja finale mbi statusin e vendit të arrihet në konsultim me të gjitha bashkësitë që jetojnë në Kosovë dhe që një marrëveshje e tillë të mbrojë të drejtat e të gjitha bashkësive – shqiptarëve, serbëve, romëve, ashkalinjve, boshnjakëve, goranëve dhe turqve, si dhe të drejtat e grave, edhe nëse konsultimet e tilla mund të kërkojnë edhe më shumë kohë. ”Masat për mbrojtjen e të drejtave të njeriut të gjithë njerëzve të Kosovës duhet të mbesin në qendër të bisedimeve”, thotë AI. “Se cilat und të janë këto masa, ky është një vendim i cili duhet të miratohet në konsultim me shoqërinë civile në Kosovë”. AI shpreh keqardhje për faktin që bashkësia ndërkombëtare nuk ka kërkuar që dy palët e negociatave të konsultohen me përfaqësuesit e shoqërisë civile. Sipas një raporti të përgatitur nga AI, respektimi i të drejtave të njeriut për të gjithë, pa diskriminim, duhet të ketë qenë në qendër të procesit të negociatave dhe “...brenga kryesore në të gjitha vendimet dhe marrëveshjet mbi të ardhmen e Kosovës”. Në raportin e saj, AI propozon një varg masash për të siguruar që të drejtat e njeriut do të mbrohen dhe të respektohen, pavarësisht nga statusi i ardhshëm i Kosovës. Amnesty International propozon që të drejtat të garantohen në Kushtetutën e Re të Kosovës, të definojnë marrëdhëniet në mes të legjislacionit vendor dhe pakteve ndërkombëtare mbi të drejtat e njeriut, të miratojë masa për përmirësimin e punës së gjyqësorit, të paraqes garanci për të drejtat e minoriteteve, dhe të harmonizojë përgjegjësitë e zyrave kompetente me standarde të pranuara ndërkombëtare.