AQMGjV kërkon largimin e drejtuesit të BB nga Shqipëria

Aleanca Qytetare për Mbrojtjen dhe Zhvillimin e Gjirit të Vlores (AQMGjV), u njoh nëpërmjet shtypit me një letër që z. Nadir Mohamed, drejtor rezident i Bankës Boterore (BB) në Shqipëri, i ka dërguar qeverisë shqiptare. Gazeta "Vlora ne Rrezik" AQMGjV dënon ashpër këtë letër, tonin arrogant dhe trysninë që Nadir Mohamed përpiqet t'i bëjë qeverisë shqiptare, dhe kërkon largimin e Nadir Mohamed nga Shqipëria. AQMGjV kujton se arsyeja e vërtetë e kësaj letre është qëndrimi i drejtë i qeverisë shqiptare për zhvendosjen e gjurmës së AMBO-s nga gjiri historik dhe turistik i Vlorës. Aleanca thekson dhe një herë se projekti i TEC-it apo TEC-eve në plazhin e Triportit në Vlorë - në kundërshtim me pretendimet e Bankës Botërore se do të ndërtoheshin kinse për të furnizuar me energji elektrike Vlorën dhe qytete të tjera të Jugut - ishte parashikuar vetëm e vetëm që të shërbente si burim energjie për pompat thithëse të naftësjellesit dhe naftëmbajtësëve gjigandë që do të ndotnin dhe shkatërronin përfundimisht Vlorën. AQMGjV i kujton z. Mohamed se, para se të kritikojë qeverinë shqiptare, Banka Botërore duhet të hetojë korrupsionin e madh që lidhet me huatë që Banka Boterore jep me lumë për vendet në zhvillim, dhe që kthehen shumica në xhepat e nëpunesve dhe konsulentëve shpesh krejt të paafte dhe të panevojshëm të kësaj të fundit. AQMGjV i bën thirrje qeverisë shqiptare që të hedhë poshtë insinuatat, shpifjet dhe trysnitë e z. Nadir Mohamed. Njëkohësisht AQMGjV i kërkon qeverisë që të pezullojë menjëherë disbursimin e të gjitha kredive të Bankës Botërore, të fillojë një proces të gjërë dhe të thellë të shqyrtimit të efektivitetit të të gjitha kredive të marra deri tani, dhe nëse gjen raste të provuara shpërdorimesh, korrupsioni, keqadministrimi dhe mos-efektiviteti të huave, të kërkojë kthimin e parave prej dëmtuesve. Brezave të ardhshëm të këtij vendi nuk mund dhe nuk u duhet lënë si trashëgimi që të paguajnë kusuret e disa nëpunësve të pandërgjegjshëm të Bankës Botërore , apo qoftë këta edhe shqiptarë.

Komentet e përdoruesve