Konferenca "Hannah Arendt" mbahet në Prishtinë

Në organizim të OJQ-së BELGRADE CIRCLE dhe Institutit kosovar për gazetari dhe komunikim - KIJAC, prej datës 22 deri më 26 tetor, në Prishtinë, do të zhvillohet konferenca, "Hannah Arendt në politikën e përfshirjes/përjashtimit", e cila mbahet në kuadër të programit studentor për këmbim, "Ballkani në rrugën drejt Evropës: Arsimimi për Evropën që do të vijë" (Dialogu Serbi – Kosovë 2006-2009). Konferenca katërditore do të fillojë me takimin e Këshillit organizativ, për të vazhduar më pastaj me seminar, të cilit do ta hapin Obrad Savic (Belgrade Circle), Willem Houven (KIJAC) dhe Shkëlzen Maliqi ('Gani Bobi' Institute). Në disa seanca të kësaj konference, pjesëmarrësit nga Kosova, Serbia, Kroacia, Gjermania e Sllovenia do të trajtojnë temat: "Rreth Evropës kozmopolite: Lidhja e Hannah Arendtit me Evropën që do të vijë", "Lidhja e përgjegjësisë politike me predikimin bashkëkohor demokratik", "Drejtësia kufitare evropiane: mes përjashtimit dhe përfshirjes" "Gjuha e kujtesës dhe e kaluara e përbashkët evropiane" dhe "Evropa mes republikanizmit dhe neoliberalizmit", për të vazhduar më pastaj me filmin dokumentar "What Remains?" (Mbetjet gjuhësore, Günther Gaus: Intervista me Hannah Arendt), ekspozitën "Fotografi nga arkivi i Hannah Arendtit" si dhe me promovimin e librit "Të zënë rob nga djalli: Trashëgimia e Hannah Arendtit", i përgatitur nga Dasa Duhacek dhe Obrad Savic (Belgrade Circle, Belgrade Women's Studies Center - edicioni i dytë 2006). Gjatë ditëve të kësaj konference, pjesëmarrësit do të vizitojnë një mori institucionesh qeveritare, mediale dhe arsimore në Kosovë (UNMIK, UNDP, Koha Ditore, Express, Građanski list etj.), ndërsa studentët nga shtetet pjesëmarrëse do të kenë rastin të diskutojnë mbi temat e parashtruara. Pjesëmarrës në këtë konferencë krahas organizatorëve nga Belgrade Circle dhe KIJAC, do të jenë edhe studiues nga Instituti "Gani Bobi" (Kosovë), Qendra "Hannah Arendt" (Gjermani), Instituti i Paqes (Slloveni) Qendra "Studimet e femrave" (Serbi) , Universiteti i Prishtinës (Kosovë) etj. Partnerë të këtij projekti janë disa institucione shkencore e arsimore nga Serbia, Kosova, Maqedonia.

Komentet e përdoruesve