U shpall tenderi ndërkombëtar për operatorin e dytë të telefonisë mobile

Ministria e Transportit dhe Postë-Telekomunikacionit (MTPT), sot shpalli tenderin ndërkombëtar për operatorin e dytë të telefonisë mobile, ndërsa aplikimi i kompanive të interesuara do të fillojë qysh në javën e ardhshme, u bë e ditur sot nga kjo Ministri. Zëdhënësi i MTPT-së, Shefki Ukaj ka bërë të ditur që nesër në mesditë do të shpallet zyrtarisht i hapur tenderi për operatorin e dytë të telefonisë mobile në Kosovë. Për licencimin e operatorit të dytë të telefonisë mobile në Kosovë është zgjedhë metoda e kombinuar, çmimi minimal 20 milionë euro, plus ankand për këtë çmim, plus i ashtuquajturi Beauty Contest. Kompania që ofron më së shumti të holla në tender fiton 30% të pikëve, për nivelin dhe afatin e mbulueshmërisë, po ashtu fitohen 30%, partneriteti vendor dhe numri i punonjësve siguron 20%, shërbimet dhe kualiteti sjell 10% të pikëve aq sa edhe përvoja në telefoninë mobile. Qeveria e Kosovës, nëpërmes tenderit ndërkombëtar ka përzgjedhur firmën konsultative suedeze, "Stela Con" për këshillues në ankandin e kësaj telefonie. Ky do të jetë tenderi i dytë për operatorin e dytë. Tenderi i parë është ishte shpallur dhe anuluar gjatë vitit 2004. Atë kohë, korporata kosovaro-sllovene, "Mobikos Mobitel" ishte shpallur fituese e tenderit, por ish-shefi i UNMIK-ut, Soren Jesen-Petersen kishte anuluar tërë procesin e tenderimit. Sipas, Ministrit të MTPT-së, Qemal Ahmeti, pritet që deri në fund të muajit shkurt 2007 të shpallet fituesi i këtij tenderi. Fituesi i këtij tenderi do të ketë të drejtë ta shfrytëzojë licencën e marrë për një periudhë 15 vjeçare, përderisa kompania fituese do të përdorë kodin e vendit nga i cili vjen gjersa Kosova nuk do ta ketë një të tillë.

Komentet e përdoruesve