Lëvizja MJAFT në Lezhë, një “ekspozitë” me mbeturinat

Aktivistët e Lëvizjes MJAFT në Lezhë kanë denoncuar sot situatën tejet problematike të mjedisit në këtë qytet. Ata kanë fotografuar të gjitha vendet e mbushura me mbeturina, të shpërndara në të gjithë qytetin, dhe përmes 120 fotografive kanë ftuar qytetarët e Lezhës që të firmosin një peticion drejtuar autoriteteve lokale për të ndryshuar këtë situatë. Qyteti i Lezhes Në këtë peticion, aktivistët e Klubit qytetar të MJAFT-it në Lezhë kërkuan që autoritetet të gjejnë mundësinë e krijimit të një venddepozitimi të përhershëm të këtyre mbeturinave dhe të sigurojnë sa më parë një sistem funksional për pastrimin sistematik të tyre. “Eshtë e pafalshme që një qytet me kaq shumë histori, u prezantohet fillimisht turistëve me një pamje të tillë mjeruese”, tha Ermal Gega, aktivist i MJAFT-it në qytetin e Lezhës. Ndërkohë, Altin Jahu, drejtues i këtij klubi u shpreh optimist për këtë aksion dhe bëri të ditur se ky klub është i vendosur t’i shkojë deri në fund këtij problemi edhe me protesta masive. E para protestë do të zhvillohet ditën e enjte. Problemet e shumta mjedisore të mjedisit kanë qenë objekt i një projekti kombëtar të Lëvizjes MJAFT gjatë verës së këtij viti. Një karvan i titulluar “Jeto Gjelbër” vizitoi qytetet kryesore të Shqipërisë për të sensibilizuar të gjithë qytetarët dhe autoritetet lokale për përmirësimin e situatës mjedisore në vend.

Komentet e përdoruesve