Tryezë e rrumbullakët për të drejtën për t’iu drejtuar gjykatës për çështje mjedisore

Qendra Rajonale e Mjedisit (REC) në bashkëpunim me Ministrinë e Mjedisit janë perfshirë në një program rajonal “Përmirësimi i praktikave të pjesëmarrjes publike - Hapat e mëtejshëm për zbatimin në praktikë të Konventës së Aarhusit në vendet e Ballkanit perëndimor”, i mbështetur nga Ministria e Jashtme e Vendeve të Ulëta dhe i zbatuar nga Qendra Rajonale e Mjedisit, në bashkëpunim me partnerët e saj në këto vende. Në kuadër të aktiviteteve të këtij programi, janë një sërë aktivitetesh, të fokusuara në disa nivele dhe me disa grupe të synuara në nivel qendror, vendor, shoqëria civile dhe në nivel rajonal. Një komponent i këtij programi parashikon aktivitete që lidhen me Të drejtën për t’iu drejtuar Gjykatës për çështje Mjedisore (shtylla e tretë e Konventës së Aarhusit), duke qenë një fushë me interes për Shqipërinë. Në kuadër të këtyre aktiviteteve është përgatitur një vlerësim i gjendjes në Shqipëri, zhvillimeve më të fundit në kuadër ligjor dhe detyrimeve ndërkombëtare që vendi ynë ka marrë përsipër dhe mundësive e nevojave konkrete për zbatimin në praktikë të kësaj të drejte. Ky raport vlerësues u diskutua dje, me 15 Nëntor, në një takim pune, të organizuar nga Qendra Rajonale e Mjedisit dhe Ministria e Mjedisit në mjediset e Hotel Tirana. Pjesmarrës të ndryshëm në takim theksuan nevojën e përmirësimit të kuadrit ligjor lidhur me çështjet mjedisore, vendosjen dhe zbatimin e dënimeve ligjore për dëmtuesit e mjedisit, rritjen e informimit publik dhe të pjesëmarrjes publike nga ana e Ministrisë së Mjedisit dhe institucioneve përkatëse lidhur me raste të ndryshme mjedisore, si dhe forcimin e bashkëpunimit dhe të vendosjes së kontakteve mes institucioneve, shoqatave dhe aktorëve të interesuar për të vepruar më fuqishëm në drejtim të ruajtjes dhe përmirësimit të situatës mjedisore në vend, dhe të vetë proçesit të informimit dhe të pjesëmarrjes publike gjithashtu. Në takim morrën pjesë përfaqesues të Ministrive të linjës, ekspertë të fushës, përfaqësues të OJF-ve, etj.

Komentet e përdoruesve