BERZH-i i jep 3 milionë euro kredi KEP-it

Pas dhënies së linjave kreditore për bankat komerciale në Kosovë, Banka Evropiane për Rindërtim dhe Zhvillim, i ka ndarë 3 milionë euro kredi OJQ-së, Programi për Ndërmarrjet në Kosovë (KEP), duke iu mundësuar kështu ndërmarrësve kosovarë, më shumë qasje në shërbimet financiare për të krijuar biznese të reja, apo të bëjnë zgjerimin e bizneseve ekzistuese. Udhëheqësi i zyrës së BERZH-it për Maqedoni dhe Kosovë, Kenji Nakazawa, këtë kredi e ka përshkruar si një mjet të rëndësishëm për t’i ndihmuar ndërmarrësit në Kosovë. “Kemi një mandat specifik që t’iu ndihmojmë njerëzve apo shteteve në tranzicion. Kemi 29 shtete në të cilat operojmë. Ne jemi bankë dhe iu ndihmojmë ndërmarrësve që të kenë qasje në financa”, ka thënë Nakazawa. Udhëheqësit e BERZH-it kanë premtuar vazhdimin e partneritetit në mes të BERZH-it dhe KEP-it, sidomos në aplikimin e strategjisë së KEP-it për zgjerimin e veprimtarive. BERZH është ndër institucionet e para financiare ndërkombëtare që ka filluar të veprojë pas luftës në Kosovës. Deri më sot kjo bankë ka mbështetur gjashtë projekte në sektorin financiar. Ndërkaq kjo kredi jepet në pajtim me kornizën financiare për klientët e bizneseve më të vogla.

Komentet e përdoruesve