PTK-ja e dëshiron edhe operatorin e dytë të telefonisë mobile

Kompania publike, “Posta dhe Telekomi i Kosovës”, e cila që disa vjet me radhë mban monopolin në tregun e telefonisë mobile në Kosovë - nëpërmjet operatorit të saj Vala 900 - ka shfaqur interesimin e saj për të marrë pjesë në tenderin për operatorin e dytë të telefonisë mobile. Siç kanë bërë të ditur zyrtarët e kësaj kompanie në kushte anonimiteti për mediet kosovare, PTK-ja është duke shqyrtuar mundësitë ligjore dhe komerciale që së bashku me partnerin e saj strategjik, “Cable and Wireless”, të hyjë në konkurrencë për licencë. Dosido, publikisht zyrtarët e kësaj kompanie kanë deklaruar se ende nuk është marrë ndonjë vendim për këtë gjë. Megjithatë Autoriteti Rregullativ i Telekomunikacionit në Kosovë (ART), e ka përjashtuar këtë mundësi duke spikatur nenin 36 të Ligjit për Telekomunikacionin, ku thuhet se “ART-ja do t’i ofrojë licencë çfarëdo ofruesi të shërbimeve mobile, i cili për momentin nuk është duke operuar në tregun e Kosovës. Madje sipas ART-së, e njëjta gjë sikur për PTK-në, vlen edhe për operatorin “Telenor”, i cili vepron ilegalisht në tregun e Kosovës. Për licencimin e operatorit të dytë të telefonisë mobile është zgjedhur metoda e kombinuar, ankand dhe "Beauty Contest", apo kriteret që duhet t'i plotësojnë kompanitë konkurruese. Baza e çmimit të licencës, sipas rregullave të tenderit do të kushtojë 20 milionë euro, me mundësi rritjeje varësisht sa janë në gjendje të ofrojnë kompanitë e interesuara. Paraqitja e dokumenteve nga ana e kompanive të interesuara do të fillojë prej 3 nëntorit dhe do të zgjasë deri më 17 janar të vitit të ardhshëm. Licenca e telefonisë mobile, përfshin të drejtën e përdorimit të frekuencave GSM 900/1800 MHz, e cila do të vlejë për një periudhë 15 vjeçare.

Komentet e përdoruesve