Përfundon faza e dytë e projektit për socializmin e komuniteteve ne lagjen “7 Shtatori”

Në muajin nëntor ka përfunduar projekti tetë-mujor “Plani i veprimit për riintegrim” në lagjen “7 Shtatori” në Pejë, që kryesisht ka pasur të bëjë me socializmin e jetës se personave të kthyer. Ky projekt është realizuar nga organizata joqeveritare “Syri i Vizionit” në bashkëpunim me DRC-në (Këshillin danez për refugjatë) dhe Programin e Iniciativës Kosovare (KIP). Pjesëmarrëse në kursin e analfebetizmit Të kthyerit në këtë lagje, ndërtimi i shtëpive për të cilët ka përfunduar në shtator të këtij viti, janë 25 familje rome që për një kohë kanë qenë të zhvendosur në kampin “Konik-1” në Podgoricë, në Mal të Zi. Ndërtimi i shtëpive për këtë komunitet është bërë nga DRC-ja, ndërsa organizata “Syri i Vizionit” gjatë gjithë kësaj kohe, nëpërmjet programeve të veta, ka punuar në socializmin ndërmjet komunitetit pritës dhe personave të zhvendosur, tashmë të kthyer në lagjen 7-shtatori të Pejës. Në kuadër te projektit “Plani i veprimit për riintegrim”, gjatë kësaj kohe, janë realizuar shume aktivitete me grupet e veçanta të të kthyerve dhe pritësve. Aktivitetet dhe trajnimet kanë përfshirë fushat si: avokimi, dhuna në familje, shëndeti riprodhues, kurset kundër analfabetizmit, kurset për kompjuter, kurset parashkollore etj. Pas takimeve me grupet e veprimit është krijuar një grup i avokimit i përbëre nga burrat e lagjes “7 Shtatori”, të cilët kanë vendosur që të avokojnë për pastërtinë dhe mirëmbajtjen e lagjes së tyre. Ky avokim, më pastaj është shndërruar në një fushatë e cila ka rezultuar me sukses, pasi që në pastrimin e kësaj lagje është angazhuar edhe kompania “Higjiena Teknika”, ndërsa ”Syri i Vizionit” u ka dhuruar familjarëve që jetojnë aty, shporta për mbeturina. Gjatë këtyre tetë muajve, në Komunën e Pejës janë shënuar të arritura të konsiderueshme në procesin e kthimit dhe socializmit te jetës në mes të komuniteteve të ndryshme.

Komentet e përdoruesve