Transparency International: Shqipëria në vend të parë për rryshfete

Para disa ditësh, një raport i Transparency International e rradhiti Shqipërinë të parën në botë për korrupsion ndër 63 vende të Botës që u përfshinë në studim, ku u evidentuan si më të korruptuara: mjekësia, gjykatat dhe policia. Duke iu përgjigjur pyetjeve të sondazhit të bërë nga agjencia amerikane shumia e qytetarëve janë shprehur se rryshfeti është mjeti më i lehtë për zgjidhjen e halleve të tyre për një kohë të shkurtër, pa u sorollatur dyerve të institucioneve dhe mënyra tjetër është ajo e të paturit një “mik” për zgjidhjen e problemit. Kryetari i Zyrës për Mbrojtjen e Qytetarit,z. Kreshnik Spahiu u shpreh në lidhje me këtë problem se: “Pothuajse dy të tretat e shqiptarëve apo mbi 66 për qind e popullsisë, ka rezultuar se ka i dhënë të paktën një herë ryshfet një zyrtari, për të zgjidhur një problem të caktuar”. Në studim theksohet se: “Gati 93 për qind e shqiptarëve, mendojnë se sistemi me nivelin më të lartë të korrupsionit është ai i drejtësisë, ku nëpunësit më të korruptuar llogariten të jenë gjyqtarët, prokurorët dhe avokatët, por nuk mbeten pas as spitalet, mjekët e të cilëve çdo ditë abuzojnë me pacientët, duke u marrë para për zgjidhjen e halleve të tyre. Kjo, gjithmonë në kundërshtim me aktet ligjore të përcaktuara në Kushtetutë”. Megjithëse mbi 50% e qytetarëve të intervistuar janë shprehur se qeveria ka ndërmarrë masa për të luftuar korrupsionin, këto masa nuk kanë qenë efikase përderisa Shqipëria ka mundur të lejë pas vetëm vende të tilla si Maroku apo Kameruni.

Komentet e përdoruesve