PTK-ja ngre padi ndaj “Telenor-it”, kërkon mbi 400 milionë euro dëmshpërblim

Posta dhe Telekomunikacioni i Kosovës, të mërkurën, në Gjykatën Ekonomike në Prishtinë, ka ngritur padi ndaj kompanisë norvegjeze që e ka blerë Mobtelin serb, Telenor, nga e cila kërkon t’ia paguajë mbi 400 milionë euro dëmshpërblim. Edhe pse ende nuk ka prononcime zyrtare lidhur me këtë rast, mediet kosovare theksojnë se, kjo padi ka të bëjë më dëmet që i ka shkaktuar Mobteli, operatorit të vetëm të telefonisë mobile në vend "Vala 900" (tash i riemëruar si “Vala“), me vendosjen e antenave nëpër territorin e Kosovës, të cilat edhe kanë penguar shtrirjen e valëve nëpërmjet brezit frekuencor. Këtë shumë të mjeteve në emër të dëmshpërblimit PTK-ja e kërkon nga kompania "Telenor", pasi kjo e fundit i ka blerë 100 për qind të aksioneve të operatorit serb "Mobtel". Në Gjykatën Ekonomike ne Prishtine bëhet e ditur se kjo lëndë ende nuk është marrë në shqyrtim, ndërsa edhe përgjegjësit e “Telenorit“, kanë deklaruar se ende nuk kanë marrë ndonjë njoftim nga gjykata. Para disa muajsh Autoriteti Rregullativ i Telekomunikacionit ka filluar me heqjen e antenave të operatorëve ilegalë në Kosovë, mirëpo në shumë pjesë të vendit rrjeti i tyre është duke funksionuar ende.

Komentet e përdoruesve