Një rrjet ballkanik në Gjirokastër

Lëvizja MJAFT mirëpriti këtë muaj në qytetin e Gjirokastrës përfaqësues të disa NGO-ve ballkanike që punojnë në fushën e trashëgimisë kulturore. Qëllimi i këtij takimi rajonal, ishte ngritja dhe konsolidimi i një rrjeti mes të gjitha këtyre NGO-ve të interesuara për të mbrojtur përmes projekteve të ndryshme trashëgiminë kulturore në Ballkan, e cila në fakt, nuk i njeh kufijtë politikë apo ekonomikë. Besjan Pesha (MJAFT) tha se ky takim u shërbeu pjesëmarrësve për t’u njohur edhe me situatën vërtet problematike në të cilën ndodhet aktualisht qyteti i Gjirokastrës, i shpallur Pasuri Kulturore Botërore nga UNESCO. “Ka një nevojë emergjente për të ndalur shkatërrimin e këtij qyteti unikal, qoftë shkatërrimin që ndodh si pasojë e neglizhencës dhe pamundësisë së strukturave të shoqërisë civile apo të shtetit, qoftë shkatërrimin që vjen si pasojë e ndërhyrjeve joprofesionale që banorët bëjnë duke restauruar shtëpitë e tyre”, tha Pesha, sipas të cilit takimi në fjalë shërbeu për të rritur vëmendjen ndaj Gjirokastrës edhe në nivel ballkanik. Ky takim u zhvillua nga fondacioni “Cultural Heritage Without Borders”, ndërsa partner shqiptar, vec Lëvizjes MJAFT, ishte dhe ANT. Ishin të pranishëm në këtë eveniment, përfaqësues të shoqërisë civile nga Mali i Zi, Kosova, Maqedonia, Bosnjë Hercegovina, Serbia. Ata ranë dakort që të punojnë në të ardhmen përmes projekteve të përbashkëta në rajon, në fushën e trashëgimisë kulturore.

Komentet e përdoruesve

Nuk ka komente.

 Version i printueshëm