Katastrofa ekologjike në Shëngjin, shqetësim edhe për qytetarët e Vlorës

Shpërthimi i depozitave të karburanteve në Shëngjin për banorët e Vlorës është dy herë shqetësim i madh. Së pari, shqetësimi për dëmet që iu shkaktuan banorëve të Shëngjinit nga ky shpërthim, jo vetëm për sot por edhe për të ardhmen, si rrjedhojë e ndotjes masive sidomos të lagunës së Kunë-Vain, një burim i rëndësishëm për ekonominë e kësaj zone, ndërkohë kur dëmi ekologjik i këtij ekosistemi mund të jetë i parikuperueshëm. Së dyti, AQMGjV është e shqetësuar se një kërcënim qindra herë më i madh po i afrohet Vlorës me vendosmërinë e Qeverisë Shqiptare, ose më mirë të themi të klasës politike shqiptare për të instaluar në Vlorë, pikërisht vetëm disa qindra metra larg qendrave të banuara dhe lagunës së Nartës, e shpallur zonë e mbrojtur, madje që plotëson standarde ndërkombëtare të Konventës Ramsar, një industri të tërë nafte qindra herë më të madhe se depozitat me kapacitet që konsiderohen të vogla në Shëngjin. Kërcënimi nuk rrjedh automatikisht me aksidentin e rëndë në Shëngjin, por me vetë faktin se aksidente të tilla janë të pranishme cdo vit dhe të papërjashtueshme edhe në vendet më të zhvilluara të botës. Për këtë arsye këto investime vlerësohen në standardet botërore me shkallën më të lartë të rrezikshmërisë. Kërcënimi është i shumëfishtë, pasi vec ndotjes së mundshme nga aksidentet, në Gji të Vlorës parashikohet edhe ndotja e përditshme, si rrjedhojë e djegies së naftës nga TEC-et dhe avujt e sasirave gjigande të naftës tranzit të Petroliferës dhe AMBOs. Së fundi mësuam nga media se brenda dy javëve, qeveria shqiptare do të firmosë marrëveshjen me konsorciumin "Maier Inginering", për ndërtimin e TEC-it të Vlorës. Kjo në vazhdën e eksperincës së Qeverisë Shqiptare të marrjes së vendimeve në periudha festash, si firmosja e marrëveshjes së mirëkuptimit për ndërtimin e AMBOs nga Nano në 28 dhjetor 2004, apo firmosja e lejes mjedisore të depozitave të naftës të La Petroliferës nga Xhuveli me 5 Janar 2006. Kjo marrëveshje për ndërtimin e TEC-it bëhet jo vetëm në kundërshtim me ligjin që kërkon pjesëmarrjen e publikut, por edhe në kushte të mungesës së një leje mjedisore për të. zjarr Komiteti i Përputhshmërisë së Konventës së Aarhusit, në mbledhjen e tij të fundit, mbajtur në 13 Dhjetor 2006 në Gjenevë, ku përfaqësuesi i Aleancës paraqiti qëndrimin e organizatës sonë, vendosi zyrtarisht të pranojë ankesën e AQV-së për shkelje të ligjit shqiptar mbi ratifikimin e Konventës së Aahrusit, lidhur me informimin dhe pjesëmarrjen e publikut për planet e instalimit të industrisë së naftës në gji të Vlorës. Ky komitet do t’i paraqesë së shpejti Qeverisë Shqiptare detyrimet dhe rekomandimet specifike që rrjedhin nga ky ligj në mënyrë eksplicite për rastin e Vlorës. Pas refuzimit nga ana e Gjykates Kushtetuese të Shqipërisë për të konsideruar kërkesën e AQVsë për kryerjen e referendumit vendor në Vlorë, Aleanca ka përgatitur dhe në ditët që pasojnë do të bëjë depozitimin e kërkesës së saj në Gjykatën e Strasburgut. Mbështetur në këtë proces ndërkombëtarizimi të problemit, i bëjmë thirrje Qeverisë të ndalojë cdo lloj vendimmarrje lidhur me TEC-in dhe veprat e tjera të naftës në Gji të Vlorës. Në rast të kundërt Aleanca do të aplikojë menjëherë mosbindjen civile. Aleanca deklaron publikisht se është e zhgënjyer nga qëndrimi i Partive politike lidhur me problemin e instalimit të industrisë së naftës në Gji të Vlorës dhe nuk do të mbështesë ndonjë parti politike në këto zgjedhje, ashtu sic bëri dhe me zgjedhjet e përgjithshme vitin e kaluar.

Komentet e përdoruesve