UNMIK bënë rikapitulimin e punës disavjeçare në Kosovë

Administrata civile e UNMIK-ut, në një rikapitulim të punës disavjeçare, e ka vlerësuar kontributin e saj në rindërtimin e më shumë se 17,000 shtëpive në tërë territorin e Kosovës, duke krijuar kështu kushte për kthimin e 120,000 njerëzve në shtëpitë e tyre. Po ashtu gjatë administratës së UNMIK-ut, krahas rindërtimit të infrastrukturës arsimore, janë ndërtuar/rikonstruktuar edhe 32 qendra spitalore dhe 330 ambulanca. “Nën mbikëqyrjen e administratës së UNMIK-ut janë dhënë më shumë se 2 milionë letërnjoftime dhe dokumente udhëtimi që i ka ndihmuar lirisë së lëvizjes së kosovarëve si dhe formimit të regjistrit civil i cili shërben si bazë për regjistrimin e votuesve”, thuhet në njoftimin e UNMIK-ut. Gjithashtu kjo administratë thekson ndihmën që ka dhënë Drejtoria për Çështje Banesore dhe Pronësore (HPD) e saj, që ka zgjidhur 29 mijë ankesa pronësore. Si sukses përmendet edhe ndihma që është dhënë në fushën e administratës publike, arsimit, agrikulturës, transportit dhe komunikacionit, drejtësisë etj. Administrata e UNMIK-ut, gjatë viteve të fundit ka zvogëluar numrin e zyrtarëve të saj në Kosovë. Me zgjidhjen e statusit të Kosovës, që pritet të bëhet pas disa muajsh, kjo administratë do të zëvendësohet nga një administratë më e lehtë e BE-së, që do të ketë më pak kompetenca të rezervuara.

Komentet e përdoruesve

Nuk ka komente.

 Version i printueshëm