MJAFT!Gjuha që po përdoret në fushatë, aspak etike

Lëvizja MJAFT! denoncon gjuhën që po përdoret nga politikanët në këtë fushatë, gjuhë që MJAFT! e cilësoi si “aspak etike, fyese dhe cënuese të jetës private të individëve apo kandidatëve të etiketuar”. Olta Xhacka, koordinatore për Politikat pranë Lëvizjes MJAFT! tha gjatë një konference për shtyp se “si një nga aktorët kryesorë të shoqërisë civile, Mjaft u angazhua të monitorojë dhe denoncojë publikisht rastet e shkeljes se kodit etik të sjelljes”. Ajo bëri të ditur për gazetarët se “ditën e djeshme MJAFT! u ftua nga Presidenti i Republikës për të kontribuar në respektimin e kodit të sjelljes nga partitë politike gjatë fushatës zgjedhore”. “Por do të ishte e pafalshme dhe e papranueshme për të gjithë qytetarët shqiptarë që fushata zgjedhore të kthehej nga një fushatë alternativash dhe debatesh, në një fushatë fyerjesh, shpifjesh dhe akuzash të ndërsjellta”, tha Xhacka. Sipas MJAFT! kriza e fundit e tejzgjatur politike i ka lodhur të gjithë qytetarët e Shqipërisë. Për një periudhë të gjatë kohe, falë politikanëve tanë, debatet teknike mbi zhvillimin e fushatës së zgjedhjeve u zunë vendin debateve të vërteta, atyre mbi zgjidhjet dhe alternativave ndaj problematikës së gjerë që na shqeteson cdo ditë, të gjithëve. Pjesëmarrja e gjërë në votime do të vihet gjithmonë e më shumë në pikëpyetje, për aq kohë sa kandidatët, politikanët dhe partitë politike nuk do u japin rëndësinë e duhur votuesve dhe qytetarëve, si dhe halleve dhe shqetësimeve të tyre. “Nëpërmjet kësaj deklarate, dëshirojmë t’u bëjmë thirrje të gjithë kandidatëve për bashki e komuna, të gjithë partive politike, stafeve të kandidatëve si dhe këshilltareve të tyre vendas apo të huaj, që t’u kthejnë fushatën qytetarëve shqiptarë”, u shpreh koordinatorja e MJAFT!. Ajo u bëri thirrje kandidatëve që të përqëndrohen në alternativat dhe zgjidhjet e problemeve, në debatet konstruktive, në shembuj frymëzues dhe jo në sharje, ofendime apo fyerje.

Komentet e përdoruesve

Nuk ka komente.

 Version i printueshëm