Monitorimi i Pastrimit të Mbetjeve në qytetin e Tiranës

Sot në orën 12 në mjediset e Hotel Tirana International Qendra Eden zhvilloi një takim prezantues të rezultateve të projektit “Monitorimi i Pastrimit të Mbetjeve në qytetin e Tiranës”. Monitorimi i mbetjeve nga qendra Eden © HToci Në takim ishin të pranishëm përfaqësues të tre firmave të pastrimit të qytetit të Tiranës “Bruçi”, TT Albalam dhe Eco-Acqua, përfaqësues nga mediat vizive dhe të shkruara, përfaqësues të bashkisë së Tiranës si dhe anëtarë të organizatave të shoqërisë civile. Projekti ka patur si qëllim përmirësimin e shërbimeve të ofruara për banorët e Tiranës si dhe forcimin e partneritetit publik-privat duke u mbështetur nga Partners Albania në kuadër të programit për “Demokraci dhe Qeverisje” dhe nga Banka Botërore. Merita Mansaku, drejtore e Qendrës Eden bëri një prezantim të detajuar të projektit në bazë të studimit nga monitorimi i bërë në vazhdimësi në dy faza nga anëtarët e qendrës. Në fund të fjalës së saj ajo dha konkluzionet e monitorimit si dhe analizën SWOT duke e vënë theksin në pikat e dobëta dhe të forta të proçesit të pastrimit të mbetjeve urbane. Përfaqësuesi i firmës “Bruçi”, z. Faik Bruçi pasi vlerësoi punën e bërë nga Qendra Eden tha ”… për herë të parë në zgjedhjet lokale kandidatët patën vendosur në programet e tyre një vend të rëndësishëm mjedisit duke shpresuar që kjo gjë të përmirësojë punën në të ardhmen”. Shenasi Gjoka nga Co-Plan në fjalën e tij u shpreh “Jo gjithmonë teknologjia dhe paraja sjellin pastrimin. Hedhja e mbeturinave me orar dhe klasifikimi i tyre do të ndihmojnë në zgjidhjen e problemit”.

Komentet e përdoruesve