Apel i fortë për kontrollin e armëve në festivalin e filmit

Në datat 14 dhe 18 Mars, u organizua në Tiranë, Festivali Ndërkombëtar i Filmit për të Drejtat e Njeriut në Shqipëri, edicioni i dytë. Gjatë festivalit katër-ditor u shfaqën më shumë se 16 filma e dokumentarë nga shumë vende të botës, si dhe u zhvilluan seminare, biseda e aktivitete të ndryshme. Trashegimi vdekjeprurese Dokumentari ‘Një Trashëgimi Vdekjeprurëse’ i sjellë nga projekti Kontrolli i Armëve të Lehta dhe Vogla i KE–PNUD u shfaq gjithashtu në këte Festival. Dokumentari është prodhuar nga TV Exchange i Europës Juglindore, zgjat 25 minuta dhe ka për qëllim të informojë publikun mbi rrezikun e armëve të lehta dhe të vogla, si dhe të tregojë ndikimin e tyre mbi sigurinë. Dokumentari fokusohet në ish Republikën Yogosllave të Maqedonisë, Shqipëri, Serbinë jugore dhe Kosovë. Ai ilustron efektin ortek, që ndodh kur si rezultat i përhapjes së armëve, konfliktet rajonale përkeqësohen. Ky dokumentar nuk ndalet tek shkaqet e konflikteve, por tek legjitimiti i përhapjes së armëve gjatë periudhave të konflikteve, sepse edhe shumë kohë mbasi lufta ka mbaruar, armët vazhdojnë të vrasin. “Nëpërmjet imazheve të një platforme kulturale, Festivali solli një panoramë të gjerë të eksperiencave njerëzore në të gjithë botën’’, thotë drejtori i Festivalit Kujtim Çashku. “Këto eksperienca njerëzore do të na ndihmojnë të krahasohemi me të tjerët dhe të vetëndërgjegjësohemi. Ashtu siç thuhet në Deklaratën e të Drejtave të Njeriut, çdo person, çdo shoqëri nuk duhet të reshtë së luftuari për të njohur e kuptuar të drejtat dhe liritë njerëzore”. Kjo ishte hera e parë që në Festivalin Ndërkombëtar të Filmit për të Drejtat e Njeriut në Shqiperi shfaqej një film mbi armët dhe sigurinë. Nëpërmjet këtij festivali u bë një apel i fortë për kontrollin e armëve, pasi ky i fundit mund të konsiderohet si mjeti që mund të çojë në abuzime me të drejtat e njeriut.

Komentet e përdoruesve