Mjaft kërkon karta identiteti

Në 50 vjetorin e Bashkimit Europian, aktivistë të Lëvizjes Mjaft protestuan përpara Kuvendit të Shqipërisë. Të rrethuar nga tela me gjëmba që simbolizonin barrierat ndarëse të Shqipërisë nga Europa, të rinjtë e Mjaft e përqëndruan protestën e tyre në mungesën e kartave të identitetit. “Edhe pse modernizimi dhe verifikimi i rregjistrit kombëtar të popullsisë, pasuar kjo nga prodhimi dhe shpërndarja e kartave të identitetit, është një nga kërkesat kryesore të MSA, qeveria shqiptare ende nuk ka ndërmarrë ndonjë hap konkret për përmbushjen e këtyre nevojave”, u shpreh Elisa Spiropali, aktiviste e Mjaft. Sipas Mjaft Shqipëria renditet në vendin e dytë më të korruptuar në Evropë, ndërkohë që edhe shifrat e krimit të organizuar, varfërisë dhe papunësië janë po ashtu dëshpëruese. Parë nga ky këndvështrim, shqiptarët, ndryshe nga më shumë se 500 milion qytetarët e tjerë europianë, nuk kanë asgjë për të festuar. Duke u përqëndruar në problemin e kartave të identitetit, aktivistët e lëvizjes Mjaft! kërkuan nga ekzekutivi shqiptar mbajtjen e premtimeve. “Qeveria shqiptare duhet të tregohet shumë e kujdesshme”, u shpreh Spiropali, “pasi përpara se të prodhohen kartat e identitetit duhet doemos të kryhet verifikimi dhe kompjuterizimi I rregjistrit kombëtar të popullsisë”. Gjatë kësaj proteste, dhjetëra aktivistë të lëvizjes Mjaft mbanin në duar pankarta me thirrje “E duam Shqipërinë si e gjithë Europa” apo “Kush e di sa jemi?”.

Komentet e përdoruesve

Nuk ka komente.

 Version i printueshëm