AER-i prezanton projektin "Përkrahje për policinë"

Përfaqësuesit e Agjencisë Evropiane për Rindërtim (AER) kanë organizuar të enjten një tryezë ku prezantuan projektin "Përkrahje për policinë", të financuar Bashkësia Evropiane për përkrahjen e zhvillimit institucional të Ministrisë së Punëve të Brendshme, në harmoni me standardet dhe praktikat e BE-së. Ndër çështjet më të rëndësishme në fillim të implementimit të projektit ishte vlerësimi i legjislacionit ekzistues lidhur me MPB-në, si dhe zhvillimi i një koncepti strategjik për përmirësimin e zbrazëtirave juridike të identifikuara në ligje. Si çështje tjetër esenciale në këtë projekt ishte edhe shqyrtimi i strukturës organizative të MPB-së bazuar në parimet dhe standardet e BE së, siç janë orientimi drejt efikasitetit dhe efektshmërisë së stafit dhe klientëve. Themelimi i departamenteve të Ministrisë është përkrahur me propozime për përshkrimin e detyrave dhe vendeve të punës për stafin e Ministrisë, si dhe të rregullave për procedurat e brendshme, të cilat duhet ta rregullojnë punën e përditshme, bashkëpunimin, koordinimin dhe rrjedhën e punës ndërmjet njësive të MPB së. "AER-i është i kënaqur me të arriturat gjatë kësaj faze të implementimit të projektit dhe do të vazhdojë përkrahjen e tij përmes ndërtimit të kapaciteteve për Ministrinë", tha Miriam Fuchs, menaxhere e Programit në AER. Në këtë tryezë u fol edhe për trajnimet e veçanta për Shtyllën e Krimit të Shërbimit Policor të Kosovës. Ndërkaq zëvendësministri i Punëve të Brendshme, Dejan Jankoviq, falënderoi ekspertët e AER it për punën dhe angazhimet e tyre për ngritjen dhe profesionalizimin e MPB.

Komentet e përdoruesve

Nuk ka komente.

 Version i printueshëm