Një televizor, dhe një oktapod, përpara Prokurorisë!

Lëvizja MJAFT! i kërkoi Prokurorisë së Përgjithshme që të sqarojë qytetarët e këtij vendi, përmes hapësirës që i jep ligji, se kush thotë të vërtetën: kryeministri Sali Berisha, i cili e akuzon median për lidhje me mafian, apo media që i përgjigjet atij me të njëjtën mënyrë. Leart Kola, aktivist i Lëvizjes MJAFT! tha se “është e papranueshme që kryeministri i vendit e krahason median me hanxharë të mafias. Por po aq e papranueshme është fakti që Prokuroria, e cila duhej të hetonte gjithcka, hesht”. Kola theksoi se “në fund të fundit asnjë qytetar nuk i ka kujt për borxh që të dëgjojë nga mëngjesi në darkë akuza pafund”, ndaj ai i bëri organit të akuzës, në emër të aktivistëve të tjerë, një kërkesë të thjeshtë: “të na sqarojë nëse ajo që thotë kryeministri është e vërtetë dhe media përdoret vërtet nga mafia, e nëse është kështu të na thotë edhe se cila media konkretisht, ose të na thotë nëse kryeministri Berisha gënjen”. Për këtë arsye, aktivistë të lëvizjes MJAFT! vendosën një televizor, në hyrje të Prokurorisë së Përgjithshme në Tiranë, dhe i vunë atij përsipër një oktapod me tentakulat e të cilit mbulohej ekrani i televizorit, ku shfaqej imazhi i kryeministrit. Për shumë shqiptarë, oktapodi dhe tentakulat e tij janë identifikuar me simbolin e mafias dhe lidhjeve të ngatërruara të saj. Kjo kërkesë e MJAFT! erdhi dy ditë pasi Berisha ripërsëriti akuza të rënda për median, duke e akuzuar atë për lidhje me mafian. Berisha tha shprehimisht gjatë një mbledhje të qeverisë se: “mediat po përdoren si hanxharë nga mafia për të demonizuar procese dhe individë”, ndërkohë që media nga ana tjetër iu përgjigj gjithashtu me akuza.

Komentet e përdoruesve

Nuk ka komente.

 Version i printueshëm