Ligji për Komisionin e Pavarur për Media nuk po zbatohet në praktikë

Ligji për Komisionin e Pavarur për Media nuk po zbatohet në praktikë. Ky ishte përfundimi i nxjerrë pas dëgjimit publik të Komisionit parlamentar për media me përfaqësues të KPM-së dhe AMPEK-ut, që u mbajt të martën në Prishtinë. Vërejtjet dhe brengat e Asociacionit të Mediave të Pavarura Elektronike të Kosovës janë shqyrtuar në një dëgjim publik të organizuar nga Komisioni për Shërbime Publike, Administratë Lokale dhe Media i Kuvendit të Kosovë, i kryesuar nga Nekibe kelmendi. Vërejtjet e AMPEK-ut, të prezantuara nga drejtoresha ekzekutive e tij, Ardita Zejnullahu, kishin të bëjnë posaçërisht me faktin se derisa transmetuesit tokësorë janë të obliguar t’u përmbahen rregullave ligjore në fuqi, operatorët kabllovik ushtrojnë pa asnjë problem veprimtarinë e tyre ilegale në Kosovë dhe në këtë mënyrë seriozisht rrezikohet konkurrenca e ndershme ndërmjet mediave. Në Kosovë veprojnë edhe transmetues pa licencë që mund të kenë edhe rol destruktiv, madje transmetuesit edhe pengojnë njëri-tjetrin, u tha në këtë dëgjim publik. Kryeshefja e ekzekutivit të KPM-së, Naile Selimaj, duke folur për këto probleme të ngritura, tha se Ligji për Komisionin e Pavarur për Media është duke u zbatuar, por jo me dinamikën e paraparë dhe në tërësinë e tij, si pasojë edhe e mungesës së akteve nënligjore. Kur është fjala për vërejtjet rreth punës së operatorëve kabllovik, ajo tha se deri nga fundi i prillit do të jetë e gatshme draft-rregullorja me të cilën do të rregullohet transmetimi i këtyre operatorëve. Ajo tha se në praktikën e deritashme bëhet monitorimi periodik dhe sipas ankesave. Rrethanë kufizuese në këtë aspekt është mungesa e eksperiencës, kufizimet buxhetore, si dhe mungesa e kapaciteteve të nevojshme njerëzore. Në të gjitha këto aktivitete negativisht po reflektohet edhe fakti që Unioni Evropian i Telekomunikacionit ende nuk e njeh si anëtare Kosovën. Refik Kasi, përfaqësues nga Qendra për Komunitete, bëri vërejtje se disa pjesë, sidomos ato të populluara nga komuniteti boshnjak, por edhe ai goran nuk mbulohen nga RTK-ja, ndërkaq, qytetarët janë të obliguar të paguajnë taksën mujore për këtë transmetues. Ai propozoi që për nevoja të qytetarëve boshnjakë të Zhupës të shpallet një tender për një transmetues radioteleviziv.

Komentet e përdoruesve

Nuk ka komente.

 Version i printueshëm