Protesta për lirinë e medias

Të paktën 50 mijë shqiptarë iu përgjigjën të Premten me13 Prill, me një manifestim paqësor në Sheshin Skënderbej sulmeve të kryeministrit Sali Berisha ndaj medias, duke shënuar kështu manifestimin e parë të këtyre përmasave në historinë e pluralizmit shqiptar, të organizuar jo nga ndonjë parti politike, por nga shoqëria civile dhe media. Duke ngritur duart në të njëjtën kohë për t’i thënë MJAFT çdo përpjekjeje të pushtetit që tenton të gjunjëzojë median e pavarur, ata shprehën atë mbrëmje, në sheshin kryesor të vendit, mbi të gjitha respektin ndaj lirisë së fjalës, të fituar me shumë mund plot 17 vjet më parë. Erion Veliaj, drejtues i Lëvizjes MJAFT! iu drejtua qytetarëve të pranishëm në shesh, dhe miliona të tjerëve që e ndoqën këtë manifestim nga ekranet e televizioneve, me fjalët: “Imagjinoni një Shqipëri pa fjalën e lirë, imagjinoni një vend ku mijëra vetë humbasin vendet e punës por nuk ka media që ta denoncojë këtë gjë, imagjinoni një vend ku bizneset falimentojnë e ku kompanitë më të mëdha largohen nga sytë këmbët, imagjinojeni atë vend pa një media të lirë, ku të transmetoheshin këto halle”. Kjo ishte koncert-protesta e paralajmëruar që Lëvizja MJAFT! së bashku me median e lirë në vend, organizuan menjëherë pasi qeveria e drejtuar nga z. Berisha nisi disa sulme selektive dhe të cilësuara si tejet të rrezikshme, ndaj institucineve të pavarura mediatike në vend.

Komentet e përdoruesve

Nuk ka komente.

 Version i printueshëm